Jagdeep ji or unke bete Javed jaffrey ji ka ye Serial "Truck Dhina Dhin" Doordarshan ka ek hit Show tha 90s ke dino me.
Aaj jab baat hoti hai logo se un purane dino ke baare me to bahut hi kam logo ko is show ke baare me pata hai, infact net surfing ke dauraan bhi kuch jayada information is show ke baare me haath nahi lagi.
Par isi show me kaam karne wale Mr. Shishir Sharma ji ka Blog dekhne ko mila or mili ye Photo jo mene yaha share ki hai.
Jaha tak mujhe yaad aata hai to ye show ek "TOP 20 COUNTDOWN SHOW" tha. jisme is Show ke beech me Songs bhi aaya karte the.
Jagdeep ji or Javed ji vese to real life me Baap bete hai, jesa ki mene pehle jikar kiya par is show me dono ne Mama Bhanje ka role adaa kiya hai.
Jagdeep jinhe jayadatar log "SHOORMA BHOPALI" ke naam ya Sholey movie me unki adakaari se jaante hai, unka is show me bhi role utna hi strong tha, or unki Moochey to maano unke talent or kirdaaro me Chaar chaand lagane ka kaam karti hai.
Baat hai garmi ki chuttiyo ki jab Schools 2-3 mahino ke liye band ho jaya karte the, aaj kal to fashion hai ki log kabhi Manali, Dubai, Thailand jane ki planning karte hai, wahi jab hum bacche the tab ya to Nani ghar ya phir Dadi ghar jana hua karta tha, Jamkar masti or khoob Dhamaal kiya karte the.
Ye show Doordarshan pe raat 9 baje ke baad telecast hua karta tha, Din bhar ki Badmaashi jab khatam ho jaya karti thi tab himmat nahi hua karti thi ki raat ko der tak jaga jaye, par is show ko dekhne ja Chaska hi kahiye jise dekhne ke liye hum jaaga karte the or sab saath milkar dekhte the.
Comments
Post a Comment